ተመለሳ እባ ንኤርትራ

 ጸልማት እምብዛ ገዲዱ

ዓመጽ ዶቡ ኣግፊሑ

ግፍዒ ስልጣኑ ኣደልዲሉ

ሕስራን ባይታ ኣጣጢሑ

ሕሰም ኣባይቲ ካሕኪሑ

 

 

ኣቦ ብዘይጠዋሪ

ኣደ ብዘይሓብሓቢ

ህጻን ብዘይ ኣባዲ

ጐበዝ ብዘይ ራኢ

                             ሃገር ብዘይ መጻኢ

ዝፋን ብሓጥእያት

መራሒ ብሓሶት

ገዛኢ ብምትላል

ፈራዲ ብዘይፍትሒ

ስልጣን ንጥቕሚ

ተስፋ ተቐቢጹ

ሞራል ተሰቢሩ

ኣእጋር ኣላሽ ኢሉ

ሕልና ዓሪቡ

ነፍሲ ተሓሊሉ

 

ኣውያት ብዘይሰማዒ

ንብዓት ብዘይ ደራዚ

ልቢ ብዘይዘናኒ

ቑስሊ ብዘይፈውሲ

ሕቶ ብዘይመልሲ

ሰማያት ጸልሚቱ

ምድሪ ዓረ ኰይኑ

ግርሁ ጠሊሙ

ዓጸቦ ኣሳፊሑ

ለማኒ በዚሑ

 

መልሓስ ተሎኺቱ

ፍርሒ ልቢ ሒዙ

ሓቂ ተደፊኑ

ትዕቢት ተውጢሩ

ዱጓና ሰፊሑ

 

ጎብዝ ኣብ በርኻ

ከርተት ምድረበዳ

ኰይኑ ቀለብ ዓሳ

ሞጐሱ ሃሲሱ

ጹዩፍ ስደተኛ

 

ዝስማዕ ሕማቕ ወረ

ትርእዮ እሾክ ዕረ

ትሕልሞ ዝገደደ

ትኣምኖ ዝወሓደ

ትጽበዮ ዝኸፍኣ

 

ኣብሳ ረጊጹ ጸኒዑ

ሓጥእያት ልቢ ሒዙ

ርኽሰት ሰማይ ዓሪጉ

እምነት ባይታ ዘቢጡ

እዝግዮታ ዊሒዱ

 

ሓድነት ላሕሊሑ

እንዳባ ገኒኑ

ናተይ ናትካ ገዚፉ

ዓሌት ኣሽካሕዲዱ

ዓደይ ዓድኻ ክብረት ኰይኑ

 

መከራና ክንዲ መዓት ፍቕዲ ዘይብሉ

ምረትና ቃልት ዘይገልጾ ከቢድ

ተስፋና ዝተጸንቀቐ ጹንቁቕ

ቅልጽምና ድኹም ኣላሽ ዝበሎ

ምሽባርና ሰማይ ዝዓርገ ርጋኣት ዝተሳእኖ

 

ኣይትሕደገና ረኣየና

ንብዓትና ድርዝ ፍትሒ ኣውጽእ

እትንኮ ተስፋ ኤርትራ ንስኻ

ረድእየት ኤርትራ ካባኻ

በጃኻ ኣምላኽ ሰማይ ተመለስ እባ ንኤርትራ!