ፑልፒት፣

ኣብ በሪኽ እትቅመጥ

ብኽሉ ሰብ ድማ እትጥመት

ኣብ ገለ ቀጣን'ያ፣ ገለን ሰፋሕ

ኩሉ ዝደልያ ስማ'ዩ ፑልፒት።

                              ቅድሚ መምህር እትቀውም

                              ሰባኺ'ውን ብድሕሪኣ'ዩ ደው ዝብል

                              ዘይትቅደም፣ ብመደብ ዝመርሕ

                              ኩሉ ግዜ ኣብ መጀመርያ፣ ዘይትነቃነቅ።

 

ንዓቢ ዕላማ; እንተ ንጽቡቅ

ንናይ ሰብ ድሌት፣ እንተ ንሕማቅ

ህይወት ንምልዋጥ ኰነ ማዕኸን ንምኽዕባት

ኩሉ'ዩ ተጠቃሚኣ፣ ወሪድዋ ኣደራዕ።

                           ኩሉ'ዮ ዝጥምታ ዝብህጋ

                           ብድሕሪኣ ደው ክብል ዝደልያ

                           ወረቀቱ ኣቀሚጡ ክዛረበላ

                           እዛ ፑልፒት'ሲ ገለ ኣለዋ።

እታ! ኣብ ጉባኤ ቅዱሳን ዘላ

ጠማቲኣ በዚሑ፣ ዝደሊ ክድይባ

ብዝኰነ ኣጋጣሚ እንክጥቀመላ

ይደፍር ርእሱ ምስ ዓበይቲ ንኽቆጽራ።

                        ኣብ ካልእ መደባት ዘይጠዓሞ

                        ዝህቦ ምኽንያት ስለ ዘይጠፍኦ

                        ፑልፒት'ከ በል! ምስ ተባህለ

                        ኩሉ ገዲፉ ይመጽእ ሰጋእ ከይበለ።

 ኣብኣ መን ይድይብ ዘገድሶ

 ክመጽእ ወይ'ከኣ ክተርፍ ዝገብሮ

ንዝደየበ ስለ ዘይፈተዎ፣ ምክፋል ዝገደፎ

"ከየቋረጹ ይእከቡ ነበሩ" ዝረስዖ

ኣይወሓደን ልዕሊ "ቃሉ" ፑልፒት ውሳኔ ዝኸኖ።

                      ገለን ይብሕታ ከም መርዓቱ

                      ንዕኡ ጥራይ ዝዀነት ከም መጻምቱ

                      ይኽእል'ዩ ከማቅል ዘለዎ ኩሉ

                      እንተ ፑልፒት ግን ትመስሎ ዝተሓዝአት ንበይኑ።

 ፑልፒት ዝተነፍጎ ምድያብ ዝተኸልአ

ከም ኣንበሳ'ዩ ዝመስል ስጋ ዝተኣበየ

ክጓዝም ይውዕል ከም ዝጠመየ

ሓርቆቱ ሓያል'ዩ ክሳዕ ዘይደየበ።

                    ገለን ከኣ ፑልፒት ምስ ተኸልአ

                    ናቱ ክተክል ስለ ዝደለየ

                   ራእይ ኣለኒ ይብል መታን ክፍለ

                   ፑልፒት ክገብር ዝከኣሎ ምስ ገበረ።

ገለ ምስ ዝፈትውዎ፣ ምስ ዘየስግኦም

ምስ ዝጥዕሞም፣ ቀሊል ምስ ዝዀነሎም

መታን ከይኸዶም፣ ክኸውን ምስኦም

ከም መጠበሪ ይጥቀሙላ ንትልሞም።

                 ፈጣሪ ካብ ላዕሊ እንክጥምት

                 ሃቀና ሰብ ስለ ዝፈልጥ

                ስለ ዝደሊ ዝተማህረ ካብኡ

                ንዕኡ ዝውክል ብኽሉ ንብረቱ

                የኽብሮ ብግዚኡ ይሸሞ ንዕይኡ።

ግን ፑልፒት፣ ቃለ መሕትት እንተዝግበረላ

                እንታይ ምበለት፣ ብዛዕባ ዝጥቀሙላ

                ምስ ተሓጎሰት'ዶ ወይስ እለዩኒ ምበለት

                ዝወርዳ ዓመጽ ብኸመይ ምገለጸት።

ፑልፒት፣ ስልጣን እንተዝወሃባ፣ ንኸተፍቅድ

           ንመን ሕራይ ኢላ፣ ንመን ምሰጎገት

           ንገለ መኽበረት፣ ንገሊኦም ምሰሓቀት

           ብሓቂ ሃዲኣ ምነበረት።

እንታይ እሞ ፑልፒት'የ!

        ዕጻኺ ንሱ ኰይኑ ቦታኺ

        ፍታሕ ክሳዕ ዝህበኪ ፈጣሪ

        ዘመንኪ ክሳዕ ዝመጽእ፣ ንኽትከብሪ

        ክሳዕ ኣትዀኒ መግለጺ ክብሪ

        ትዕግስቲ! ወጋሕታ ንኽመጸልኪ።

                                                         ሳምሶን ም-ኣብ