ተግባርና ቀጥታዊ ውጺኢት ናይ ኣተሓሳስባና የርኢ። ኣሉታዊ ኣተሓሳስባ እንተሎና ኣሉታዊ ህይወት ድማ ንነብር። በቲ ሓደ ወገን ድማ ኣእምሮና ብቃል ኣምላኽ እንተኣሐዲስናዮ ከምቲ ኣብ ሮሜ 12፣2  እንረኽቦ ተስፋ ቃል '' እቲ ሰናይን ባህ ዜብልን ምሉእን ፍቓድ ኣምላኽ '' ክንምርምርን ክንፈልጥን ንኽእል።

ነዛ መጽሓፍ እዚኣ ኣብ ሰለስተ ክፍልታት ከፊለያ ኣለኹ። እቲ ቀዳማይ ክፋል ኣገዳስነት ናይ ኣተሓሳስባና ዝብል ኮይኑ፣ እንታይ ክንሓስብ ክንሓስብ ከምዘሎና ዝብል ነጥቢ ድማ ሒዙ ኣሎ።

ናይ ብዙሓት ሰባት ሽግር መበገሲኡ ካብ ኣተሓሳስብኦም ኢዩ። ሰይጣን ንኹሉ ሰብ ግጉይ ንኽሓስብ ይገብሮ። ንሕና ድማ ነዚ ኣተሓሳስባዚ ነጺግና ምስ መንፈስ ቅዱስ ዝሰማማዕ ኣተሓሳስባ ከነማዕብል ይግብኣና።

2ቆረ. 10፣4ን5 ከምዝገልጸልና ቃል ኣምላኽ ጽቡቕ ጌርና ክንፈልጦን፣ ፈሊጥና ድማ ኣእምሮና ንኣምላኽ ንምእዛዝ ከነ ዳልዎ ከምዘሎና የዘኻኽረና። ካብ ቃል ኣምላኽ ወጻኢ ንዝመጸና ሓሳብ ድማ ኣብ ኣእምሮና ከነሰላስሎ የብልናን።

እዛ መጽሓፍዚኣ ነዚ ንኽትገብሩ ክትሕግዘኩም ጸሎተይ ኢዩ።

ተስፋ ኣይትቑረጽ! ምኽንያቱ ቀስ ብቐስ ክትቅየር ትኽእል ኢኻ። በተሓሳስባኻ ብጽቡቕ እንተተዳሊኻ ብእኡ መጠን ድማ ህይወትካ ክቕየር ይጅምር። ናይ ኣምላኽ ሰናይ መደብ ኣብ ልዕሌኻ ከተስተውዕል ምስ ጀመርካ፣ በቲ መደብ ክትመላለስ ክትጅምር ኢኻ።

እቲ ዓውደ ውግእ ኣእምሮና ኢዩም (ዕራፍ 1 )

  
ካብዛ ጥቕሲ ከምእንርድኦ ኣብ ውግእ ንርከብ። እቲ ቕልስና ድማ ምስ ሰብ ኣይኮነን። ምስ ድያብሎስን ኣጋንንትን ኢዩ። ሰይጣን ንዓና ንምትላልልን ንምስዓርን ውሕሉል መደብ የውጽእ።

ሰይጣን ሓሳዊ እዩ። ጎይታ ኢየሱስ ኣብ ዮሃ. 8፣44 ‘‘. . . ሓሳዊ እዩ እሞ፣ ንሓሶትውን ኣቦኣ እዩ '' ብምባል ይገልጾ። ሰይጣን ብዛዕባናን ብዛዕባ ካሎኦት ሰባትን ኩነታትን ሓሶት ይነግረና። ይኹን ድኣ እምበር ነዚ ኹሉ ሓሶት ብሓደ እዋን ኣይነግረናን'ዩ።

ንኣእምሮና ብውሕልና ዝተዳለወ ቅንጹብ ሓሳባት፣ ጥርጣሬ፣ ፍርሂ፣ ምኽንያት፣ ተኣምራትን ክልሰ‐ሓሳባትን ብሕቶ መልክዕ የቕርበልና። ቀስ ኢሉ ድማ ተጠንቂቑ ይሰርሕ። ነስተውዕል! ጸላኢ ነቲ ቕልስናኡ ስትራተጂ የውጽእ፣ ጊዜ ወሲዱ ድማ ንነፍሲ ወከፍና የጽንዓና።

እንታይ ከም እንፈቱን እንታይ ከምእንጸልእን ይፈልጥ። ምእማናን፣ ኣየናይ ኣዝዩ ከምዘሸግረናን ድኽመትናን ፍርህናን ይፈልጥ። ንዓና ንኽስዕር ድማ ዝኣክል ጊዜ ንኸጥፍኣልና ኣይስልችዎን ኢዩ። ሓደ ካብቶም ቀንዲ ሓያል ጎኑ ድማ ትዕግስቱ ኢዩ። ጸላኢና እምበኣር ትዕግስተኛ ኢዩ።

ነቲ ጽኑዕ ዕርድታት ምፍራስ

'' ኣጽዋር ውግእና ኣብ ቅድሚ ኣምላኽ ንምፍራስ ጽኑዕ ዕርድታ ት ብርቱዕ እዩ እምበር፣ ስጋዊ ኣይኮነን፣ ብእኡ ኸኣ ሓሳባትን ምስ ፍልጠት ኣምላኽ ንዚጻላእ ልዕል ዝበለ ነገር ኩሉን እናፍረ ስና፣ ኩሉ ኣእምሮውን ንምእዛዝ ንማርኸሉ ኢና።''   (2ቆረ. 10፣ 4‐5)

ሰይጣን ብጥንቑቕን ዘደናግርን ሜላታት ተጠቒሙ፣ ኣብ ኣእምሮና '' ጽኑዕ ዕርዲ'' ይፈጥር።

ኣብ ላዕሊ ጳውሎስ ከምዝገለጾ፣ ነዚ ናይ ሰይጣን ጽኑዕ ዕርዲ ንምቅዋም ኣጽዋር ከምዘሎና የዘኻኽረና። ብዛዕባ እዞም ኣጽዋር ኣብ ዝቕጽል ክፍልታት ክንርእዮ ኢና፣ ንሕጂ ግን ኣብ መንፈሳዊ ኩናት ከም እንርከብ ክንፈልጥ ይግብኣና። ጥቕሲ 5 ነቲ ውግእ ብኸመይ ከምነሰንፎ ተብርሃልና።

ስጋብ ሕጂ ከምዝረኣናዮ፣

1. ኣብ ኩናት ንርከብ
2. ጸላኢና ድማ ሰይጣን ኢዩ
3. እቲ ዓውደ ውግእ ኣእምሮና ኢዩ
4. ሰይጣን ኣብ ልዕሊ ኣእምሮና ጽኑዕ ዕርዲ ንምስራት ይነጥፍ
5. ነዚ ድማ ብስትራቴጂን ምትላልን ይፍጽሞ
6. ከይተሃወኸ ድልየቱ ንምፍጻም ድማ እኹል ጊዜ ይወስድ

ሕጂ ድማ ነቲ ዘውጾኦ መደብ ብኸመይ ክዕወተሉ ከምዝኽእል ንዝብል ብምሳሌ ጌርና ክንሪኢ ኢና።

ብወገን ሜሪ

ሜሪን ብዓል ቤታ ጆንን ሕጉስ ዝኾነ ሓዳር የብሎምን። መብዛሕቱኡ ጊዜ ኣብ ሞንጎኦም ግጭት ኣሎ። ክልቲኦም ድማ ይሓርቁ፣ ይቕሕሩን የማርሩን። በዚ ኩነታቶም ዝተጸለው ክልተ ደቂ ኣለውዎም። በቲ ግጭት ናይ ወለዶም ሰበብ ድማ ኣብ ጠባይ ናይቶም ቆልዑን፣ ኣብ ቤት ትምህርቶም ከይተረፈ ክትንክፎም ጀሚሩ። ሓደ ኻብኦም ብሰንኪ ሕርቃን ናይ ጨጓራ ሕማም ሓሚሙ።

ናይ ሜሪ ሽግር ንጆን ከም ርእሲ ናይታ ቤት ኣይትፈልጦን እያ። ንሳ  ናይቲ ቤት ሓላቓ ክትከውን ትደሊ። ''ናይ ገዛእ ርእሳ'' ገንዘብ ከተቐመጥ ድማ ትሰርሕ። ዓው ምባል ትፈቱ፣ ትቋየቕ፣ ብርእሳውን ክትሓድር ትደሊ።

ምናልባት ''ነዚኣ ድኣ ጎይታ'ዩ ዘድልያ'' ትብሉ ትኾኑ።

ንጎይታ ትፈልጦ እያ! ሜሪ ንጎይታ ከም ናይ ውልቂ መድሓኒኣ ቅድሚ ሓሙሽተ ዓመት ተቐቢላቶ። እዚ ድማ ድሕሪ መርዕዖም ድሕሪ ሰለስተ ዓመት ምዃኑ ኢዩ።

''እሞ ድኣ ሜሪ ድሕሪ ንጎይታ ከም ናይ ውልቂ መድሓኒኣ ምቕባላ፣ ኣብ ህይወታ ለውጢ ኣይተራእየን ማለት ድዩ፧''

እወ፣ ለውጢ ኔሩ። በቲ ሕማቕ ባህሪያታ ከምተነጽገት እንተ ፈለጠት እኳ፣ ናይ ዘልኣለም ህይወት ከምእትረክብ ግን ትኣምን እያ። ቅድሚ ንጎይታ ምርካባ ቅዝንትን ተስፋ ዘይብላን እያ ኔራ።ሕጂ ድማ ተስፋ ኣለዋ፣ ግን ከኣ ቅዝንቲ(ዘይሕጉስቲ) እያ።

ሜሪ ኣተሓሳስባኣ ጉጉይ ከምዝኾነ ትኣምን ኢያ። ክትልወጥ ትደሊ።ካብ ክልተ ዝተፈላለዩ ሰባት ድማ ምኽሪ ተቐቢላ፣ ምምሕያሽ ግን ኣየርኣየትን። ስለምንታይ፧

ናይዚ መልሲ ድማ ኣብ ሮሜ 12፣2 ንረኽቦ ''እቲ ሰናይን ባህ ዜብልን ሙሉእን ፍቓድ ኣምላኽ እንታይ ምዃኑ ምእንቲ ኽትምርምሩስ፣ ብምሕዳስ ሓሳብኩም ተለወጡ እምበር፣ ነዛ ዓለም እዚኣ ኣይትምሰልዋ።''

ሜሪ ኣብ ኣእምሮኣ ጽኑዕ ዕርዲ ኣለዋ። እዚ ድማ ነዊሕ ጌሩ። እዚ ዕርድታትዚ ብኸመይ ከምዝፈርስ ድማ ኣይትፈልጥን እያ። ዓላዊት፣ ሓራቕን ተቛያቒትን ወ.ዘ.ተ ክትከውን ከምዘይብላ ትፈልጥያ። ነገር ግን ነዚ ባህርያታ ብኸመይ ክትቅይሮ ከም ትኽእል ኣይትፈልጥን። ከምቲ ክትኮኖ ዘይግብኣ ኮይና ትመ ላለስ ዘላ ድማ ተግባራታ ክትቆጻጸሮ ስለዘይክኣት እያ።

ንተግባራታ ክትቆጻጸሮ ዘይከኣለት ድማ ነተሓሳስብኣ ክትቆጻጸሮ ስለዘይከኣለት ኢዩ። ነተሓሳስብኣ ክትቆጻጸሮ ዘይከኣለት ምኽን ያትውን ሰይጣን ኣቐዲሙ ኣብ ንእስነታ ጽኑዕ ዕርዲ ስለዝሰረተ ኢዩ።

ሰይጣን ገና ንኣሽቱ ኮሎና ነቲ ውሕሉል ውጡኑ ኣተኣታትዩ፣ ተጠንቂቑ ናይ ምድንጋር ዘርኢ ክዘርእ ይጅምር። ኣብ ናይ ሜሪ ኩነታት እንተሪኢናውን፣ እቲ ሽግር ቅድሚ ብዙሕ ዓመታት ኣብ ጊዜ ንእስነታ'ዩ ተጀሚሩ።

ሜሪ ህጻን ኣብ ዝነበረትሉ ጊዜ ኣቡኣ ብሕሉፍ ይገርፋ ኔሩ። ንእሽቶ ጌጋ እንተፈጺማ ድማ ኩሉ ጊዜ ሕርቃኑ የርእያ። ንዓመታት ዝኣክል በዚ ናይ ኣቦኣ፣ ኣብ ልዕሊኣን ኣብ ልዕሊ ኣዲኣን ዝነበሮ ኣተሓሕዛ ተሳቕያ። ንዓዓን ነዲኣን ድማ ምንም ኣኽብሮት ኣይነበሮን። ሓዋ ንሜሪ ግን ካብዚ ሽግርዚ ነጻ'ዩ ኔሩ፣ ምናልባት ወዲ ተባዕታይ ስለዝኾነ ይኸውን።

ሜሪ ጓል 16 ዓመት ምስኮነት፣ ሰይጣን ናይ ሓሶት መልእኽቱ ብኸምዚ ዝስዕብ እናለኣኸ ንኣእምሮኣ ክቆጻጸሮ ጀሚሩ፣

'' ሰብኡት ንነብሶም ከም ሓደ ፍሉይ ነገር ኢዮም ዝሓስብዋ፣ ኩሎምውን ሓደ ዓይነት ኢዮም፣ ክትኣምንዮም ድማ ኣይትኽ እልን ኢኺ። ክጎድእኹን ክብለጹልክን ይደልዩ። ሰብኣይ ኔርኪ እንተትኾኒ ግን ህይወትኪ ባዕልኺ ምመራሕክያ ኔርኪ። ዝደለ ኽዮ ነገር ድማ ትፍጽሚ። ንሰባት ትእዝዝዮም፣ ሓላፊቶምውን ትኾኒ፣ ከምዝደለኽዮ ጌርኪ ድማ ትመልኪዮም።''

በዚ ሰበብዚ ድማ ኣእምሮ ናይ ሜሪ ከምዚ ዝብል መፍትሒ ረኺቡ '' ካብዚ ቤት ምስ ወጻእኩ ማንም ዝእዝዘንን ዝመልከንን የለን!''

ሰይጣን ኣብ ኣእምሮኣ ተቐሚጡ። ሓንቲ ሰብ ነዚ ሓሳባት እዚ ንኣሻሓት ጊዜ ዝኣክል ንዓሰርተ ዓመታት ምስ ኣሰላሰለቶ ተመርዕያ ምጭውትን፣ ሕራይ በሃሊትን ተፈቃሪትን ክትከውን ትኽእል ድያ፧

ሜሪ ኣብ ከምዚ ኩነታት ትርከብ። እንታይ ክትገብር ኣለዋ፧ ኣብ ከምዚ ናታ ኩነታትከ ንሕና እንታይ ምገበርና፧

እቲ ቃል ኣጽዋርና ኢዩ

''. . . ንስኻትኩም ኣብ ቃለይ እንተጸናዕኩም፣ ብሓቂ ደቀ መዛ ሙርተይ ኢኹም። ንሓቂ ኽትፈልጥዋ ኢኹም፣ እታ ሓቂ ድማ ሓራ ኸተውጽኣኩም እያ፣ በሎም።''       (ዮሃ.  8፣31‐32)

ጎይታ ኣብዚ ቦታዚ ኣብ ልዕሊ ሓሶት ናይ ሰይጣን ብከመይ ከምእንዕወት ይነግረና። ነቲ ሓቂ ዝኾነ ቃል ኣምላኽ ድማ ክንፈልጥ ይግባእ። በቲ ቃል ኣእምሮና እናሐደስና፣ ከምቲ ኣብ 2ቆረ. 10፣4ን5 ዝተገለጸ ኣጽዋር ውግእና ኣልዒልና፣ ነቲ ጽኑዕ ዕርድታት ጸላኢ ንኸነፍርስ እኹል ፍልጠት ክንሕዝ ይግባኣና።

እዞም '' ኣጽዋራት'' ድማ ብስብከት፣ ትምህርቲ፣ መጻሕፍቲ፣ ካሴት፣ ጉባኤን ካብ ናይ ውልቂ ናይ መጽሓፍ ቅዱስ መጽናዕቲ ብእንረኽቦ ቃል ኣምላኽ ከነጥርዮም ንኽእል። ኣብ ርእሲዚውን እቲ ምግላጽ ብመገዲ መንፈስ ቅዱስ ክሳብ እንረኽቦ ምስቲ ቃል ''ክንጸንዕ'' ይግባእ። ኣብ ማር. 4፣24  ኢየሱስ ከምዚ ይብለና

''ድማ በሎም፣ ብትሰምዕዎ ተጠንቀቑ። በቲ እትሰፍርሉ መስፈሪ ኺስፈረልኩም ኪውሰኸልኩምውን እዩ።''

ስለዚ ክደግሞ እየ፣ እቲ ኣጽዋር ውግእና (ቃል ኣምላኽ) ብቀጻሊ ክንጥቀመሉ ኣሎና።

ጸሎት ምስ ኣምላኽ ርክብ ምግባር ማለት ኢዩ። ብመገዲ ጸሎት ንኣምላኽ ሓገዝ ንሓቶ፣ ወይውን ዘጸግመና ነገራት ኣብ ቅድሚኡ ነቕርቦም።

ውጺኢታዊ ዝኾነ ናይ ጸሎት ህይወት ንኽህልወኩም እንተ ደሊኹም፣ ውልቃዊ ዝምድናኹም ምስ ኣምላኽ ከተማዕብሉ ኣለኩም። ንሱ የፍቅረኩም ኢዩ፣ ምሕረተኛ ኢዩ፣ ክሕግዘኩም ድማ ድልው ኢዩ። ንጎይታ ፍለጥዎ፣ ዓርኩኹም ኢዩ። ንኹላ ትና ድማ ሞይቱልና ኢዩ። ንመንፈስ ቅዱስውን ፍለጦ፣ ኣብ ውሽጥኻ ኣሎ፣ ሓጋዚኻ ምኻኑ ኣይትረስዕ! ኩሉ ጊዜ ድማ ናትካ ፍቓድ ኣርእዮ።

ጸሎትካ ብቓል ኣምላኽ ዝተሰነየ ክኸውን ኣለዎ። ቃል ኣምላኽን ናትና ድሌት ምህላውን መሰረታውያን፣ ናብ ቅድሚ ኣምላኽ ክንቀርብ ኮሎና ዘድሉዩና ነገራት ኢዮም።

ስለዚ እምበኣር ኣጽዋርና ቃል ኣምላኽ ከይሓወሰና ክንጥ ቀመሎም ኣይንኽእልን ኢና። ከምቲ ጳውሎስ ኣብ 2ቆረንጦስ ዝነገረና፣ ኣጽዋርና ስጋዊ ኣይኮኑን፣ መንፈሳዊ ኢዮም። መንፈሳዊ ኣጽዋር ዘድለየና ምኽንያት ድማ ቅልስናና ንሰይጣን ሓዊስካ ምስ እከያት መናፍስቲ  ስለዝኾነ ኢዩ። ጎይታ ኢየሱስ ከይተረፈውን ኣብቲ ናይ ምድረ በዳ ርክቡ ምስ ሰይጣን፣ ንሰይጣን ንምስዓር ቃል ኣምላኽዩ ተጠቒሙ። (ሉቃ.  4፣1‐13)  ሰይጣን ብሓሶት ንጎይታ ይዛረቦ፣ ጎይታ ድማ ቃል ኣምላኽ እናጠቐሰ '' ጽሑፍ'ዩ'' ኢሉ ይምልሰሉ ኔሩ።

ሜሪ ነጽዋራታ ክትጥቀመሎም ኣብ ዝጀመረት እዋን፣ ነቲ ኣብ ኣእምሮኣ ተነዲቑ ዘሎ፣ ዕርድታት ናይ ጸላኢ  ከተፍርስ ትጅ ምር። ነታ ሓራ ትገብር ሓቂ ድማ ክትፈልጣ ትጅምር። ኩሎም ሰቡኡት ከም ኣቦኣ ከምዘይኮኑውን ክትርዳእ ትጅምር። ገለ እኳ ከም ኣቦኣ ክኾኑ እንተኸኣሉ፣ ዝበዝሑ ግን ከም ኣቦኣ ኣይ ኮኑን። ንኣብነት ጆን ሰብኣያ ከም ኣቦኣ ኣይኮነን። ንሜሪ ድማ ኣጸቢቑ የፍቅራ ኢዩ።

ብወገን ጆን

ጆን ብወገኑ፣ ነቲ ኣብ ሞንጉኡን ኣብ ሞንጎ ብዓል ቤቱ‐ሜሪን ዘሎ ሽግር ናይ ሓዳሮም ኣስተዋጾኦ ኣለዎ።

ጆን ከም ርእሲ ናይታ ስድራ ሓላፍነቱ ክወስድ ኔርዎ። ኣምላኽ ናይቲ ገዛ ቀሺ ጌርዎ ኢዩ። ጆንውን ከም ሜሪ ዳግም ዝተወልደ ክርስትያን ኢዩ። ጉቡእ ናይ ሓዳር ስርዓት ይፈልጥ። በዓል ቤቱ፣ ወጻኢታቶምን ውላዶምን ንዑዑ ከይተረፈውን ከተማሓድሮ ከምዘብላ ይፈልጥ ኢዩ። እዚ ኩሉ እናፈለጠ ድማ ከም እተሰነፈ ፈሊጡ ናብ ቴሌቪዥን ምርኣይን፣ ኣብ ስፖርታዊ ንጥፈታትን ዘንቢሉ።

ጆን ካብ ሓላፍነት ዝሃድም ዘሎ ምግታር ስለዝጸለአ ኢዩ። ከምዚ ዝስዕብ ሓሳብ ኔርዎ ''ነዚ ኩነታትዚ ብዙሕ እንተ ዘይተገደስኩሉ ይሓይሽ፣ ምናልባት ለውጢ ይመጽእ ይኸውን'' ወይውን '' ክጽልየሉ'' እናበለ ካብቲ ግቡእ ስጉምቲ ምውሳድ ተሪፉ ይኸውን። ጸሎት ጽቡቕ ኢዩ፣ ንሓላፍነትና ግን ዘወግድ ክኸውን የብሉን።

ጆን ነቲ ኣምላኽ ዝሃቦ ሓላፍነት ክፈልጥ ኣለዎ ዝበልኩ፣ ጆን ብጃህራን ብምቑያቕን ክቀርባ ኣለዎ ማለተይ ኣይኮነን። ኤፌሶን 5፣25 ከምዝምህረና፣ ልክዕ ከምቲ ክርስቶስ ንቤተክርስትያኑ ዘፍቀራ፣ ሰብኣይ ድማ ንሰበይቱ ከምኡ ከፍቅራ ኣለዎ። ጆን ሓላፍነት ክወስድ ኔርዎ፣ ብድሕሪኡ ድማ ስልጣን ይመጽእ። ምስ ብዓል ቤቱ ብፍቕራዊ መገዲ ጽኑዕ ክኸውን ኣለዎ። ንሜሪ ድማ ሽሕ እኳ ህጻን ኣብ ዝነበረትሉ ጊዜ ብኣቦኣ እንተ ተጎደአት፣ ነዚ ጉዳይ ንኣምላኽ እንተሂባቶን ኣሚናቶን፣ ኩሎም ሰቡኡት ከም ኣቦኣ ከምዘይኮኑ ክትፈልጥ ከምዘለዋ ከረድኣ ኔርዎ።

ጆን ክገብሮ ዝግብኦ ብዙሕ ነገራት ኔሩ። ነገር ግን ንሱውን ከም ሜሪ ንጸላኢ ኣፍደገ ዝኸፍት ሽግር ኔርዎ። ስለዚ ድማ ኣብ ኣእምሩኡ ኩናት ተፈጢሩ። ከም ሜሪ ንሱውን ኣብ ጊዜ ንእስነቱ ተጎዲኡ'ዩ። ኣዲኡ ትመልኮ ኔራ። ብመልሓሳ ድማ ተጓዳኢት ኔራ። ንኣብነት ''ጆን፣ ንስኻ ጉዑዝይ ኢኻ፣ ምንም ዋጋ የብልካን'' ትብሎ ኔራ።

ጆን ብወገኑ ከም ኩሎም ቆልዑ በዲኡ ተቐባልነት ንኽረክብ፣ ነዲኡ ከሐጉሳ ብዙሕ ፈቲኑ። ነገር ግን ዝከኣሎ እኳ እንተፈተነ እቲ ዝፈጸሞ ጌጋታት እናበዝሐ ከይዱ። ጠገለ ዘይብሉ ኮይኑ ድማ ተሪፉ።

የዕሩኹቱውን ነጺጎሞ። እዚ ነገርዚ እኳ ንመብዛሕትና እንተ ኣጋጠመና፣ ንጆን ግን ኣቐዲሙ በዲኡውን ስለተነጸገ ኣዝዩ ሃሲይዎ።

ከምኡውን ናይ ካልኣይ ደረጃ ተመሃራይ ኣብ ዝነበረሉ እዋን፣ ሓንቲ ኣዝዩ ዝፈትዋ መንእሰይ ኔራ። ደሓር ግን ንዑዑ ሓዲጋ ንኻልእ መንእሰይ ኣፍቂራ። እዚ ኩሉ ነገራት ኣብ ህይወት ናይ ጆን ምስ ኣጋጠመ፣ ሰይጣን ድማ ኣብ ኣእምሩኡ ንዓመታት ዕርድታቱ ምስ ሰረተ፣ ጆን ትብዓት ዘይብሉ፣ ህዱእን ንጹሉን ሰብ ኮይኑ ተሪፉ።

ጆን ምንም ስጉምቲ ክወስዱ ካብ ዘይክእሉ ዓይነት ሰባት ኢዩ። ንዓመታት ዝኣክል ናብ ኣእምሩኡ ከምዚ ዝስዕብ ሓሳባት ይመጾ ''ንዝኾነ ሰብ እንታይ ከምትሓስብ ዘይምንጋር ይሓይሽ፣ ምኽንያቱ ድማ ዝሰምዓካ ስለዘየለ። ሰባት ክቕበሉኻ እንተ ኾይኖምውን ነቲ ዝደልይዎ ነገር ጥራሕ ሕራይ ክትብሎም ኣሎካ።''

ኣብተን በቲ ናቱ መትከል ክጸንዕ ዝፈተነሉ እዋናት ድማ ዝሰዓር ይመስሎ። ኣብ መወዳእታ ድማ ምግታር ኣየዋጻኣንንዩ ኢሉ ወሲኑ።

በዚ ምኽንያት ድማ '' ኣብ መጨረስታ ስለዝጉዳእ፣ ንምንታይ ይካታዕ፧'' ኢሉ ደምዲሙ።

እቲ መልሲ እንታይ ክኸውን ይኽእል፧

'' ንድኻታት ከበስሮም ስለ ዝቐብኣኒ፣ መንፈስ እግዚኣብሄር ኣብ ልዕለይ ኢዩ። ንምሩኻት ከምልስ፣ ንዕውራት ምርኣይ፣ ንግፉዓት ከኣ ምውጻእ ሓራ ኽሰብኽ፣ ሕርይቲ ዓመት እግዚኣብሄርውን ክሰብኽ ለአኸኒ።'' (ሉቃ.  4፣18‐19)

ናይ ጆንን ሜሪን ኩነታት ናብርኦም እንታይ ከምዝመስል ንምግማቱ ኣየጸግምንዩ። ኣቐዲመ ብዙሕ ቋይቂ ከምዘሎ ነጊ ረኩም ኔረ። ግጭት(ቋይቂ) ኩሉ ሰብ ከምዘሎ ዝፈልጦዩ፣ ንዕዑ ንምእላይ ግን ስጉምቲ ዝወስድ ዳርጋ የለን። እቲ ኩነታት ናይ ገዝኦም ዘሕዝን'ዩ፣ ሰይጣን ድማ እዚ ኹነታት ምህላው ብጣዕሚ ደስ ይብሎ።

ንጆን ሜሪንን ደቆምን እንታይ የጋጥሞም ይኸውን፧ ነዚ ኩነታቶም ክሳገርዎ ይኽእሉዶ ይኾኑ፧ ክርስትያናት ኢዮም - ሓዳሮምን ቤተሰቦምን ፋሕ ክብል ድማ የሕንኽ ኢዩ። ምዃን እኳ ናቶም ሽግር ኢዩ። ዮሃ. 8፣31ን32 ኣብቲ ናቶም ኩነታት ወሳኒ ቃል ኢዩ። እንተዳኣ ብቐጻሊ ቃል ኣምላኽ ኣጽኒዖም፣ ነታ ሓቂ ክፈልጥዋ ኢዮም። ኣብ ልዕሊ እታ ሓቂ ድማ ስጉምቲ እንተወሲዶም ሓራ ክኾኑ ኢዮም።ስለዚ ድማ ነፍሲ ወከፎም ነታ ሓቂ ክፈልጥዋን ክደልይዋን ብዛዕባ ዝሓለፈ ህይወቶም ድማ ንኣምላኽ ክህብዎ ኣለዎም።

ሓቂ ድማ ኩሉ ጊዜ ብቃል ኣምላኽያ ትግለጽ። እቲ ዘሕዝን ድማ ሰባት ነዚ ኩሉ ጊዜ ክቕበልዎ ኣይደልዩን ኢዮም። ድኽመታትና ኣግሂድና ንመፍትሒኡ ምብጋስ የሕምመና። ብሓፈሻዊ ኣዘራርባ ሰባት ንነውሮም ብምኽንያት ይሓልፍዎ። ነቲ ሕማቕ ባህሪኦም ሸለል ብምባል፣ ነዚ ሕጂ ዘለውዎ ህይወቶም ብኣሉታዊ መገዲ ንኽጸልዎም ዕድል ይኸፈትሉ።

ዝሓለፈ ህይወትና ነቲ ሽግርና ክገልጾ ይኽእል ይኸውን፣ ነገር ግን ኣብ ትሕቲ እስራት ንኸይንጸንሕ ከም ምኽንያት ኣይን ጠቀመሉ።

ኩላትና ካብ ምኽንያት ውጽኣት ኢና፣ ምኽንያቱ ድማ ኢየሱስ ከም ቃሉ መሰረት ካብቲ ግፍዒ ናይ ጸላኢና ንኸውጽኣና ኩሉ ጊዜ ድልው ስለዝኾነ። እንተዳኣ ምስ ጎይታ ማዕረ ማዕረ ክንከይድ ድልየት ኣሎና፣ ንሱ ድማ ስጋብ እቲ ናይ መጨረስታ ናይ ዓወት መስመር ከብጽሓና ድልው ኢዩ።

መውጺኢ መገዲ ኣሎካ

'' ሰብ ክጾሮ ዘይኽእል ፈተና ኣይበጽሓኩምን። ኣምላኽ እሙን እዩ እሞ፣ ምስቲ ፈተናኹም ምጽዋሩ ምእንቲ ኽትክእሉስ፣ መው ጺኢ ገይሩልኩም ኣሎ፣ ካብ ዓቕምኹም ንንየው ክትፍተኑ ኣይ ሓድገኩምን እዩ።''          (1ቆረ. 10፣13)

ካብቲ ኣቐዲምና ዝረኣናዮ ጽውጽዋይ ዝመስል ኩነታት፣ ሰይጣን ከመይ ጌሩ ኣብ ልዕሊ ኩነታትናን ህይወትናን ጽኑዕ ዕርድታት ክስርት ከምዝኽእል ንምግማት ኣየጸግምን'ዩ። ነዚ ጽኑዕ ዕርድታት ከነፍርሰሉ እንኽእል ኣጽዋር ስለዝሃበና ክብሪ ንኣምላኽ!  ኣምላኽ ኣይኩንነናን'ዩ፣ ሓገዝ ዘይብልናውን ኣይገድ ፈናን'ዩ። (1ቆረ.  10፣13)  ኣምላኽ ብኽንጻወሮ ዘይንኽእል ፈተና ኣይፍትነናን ኢዩ፣ ነገር ግን ምስ ነፍሲ ወከፍ ፈተና መውጺኢ መገዲ ይፈጥረልና።

ገሌና ከም ጆን፣ ገሌና ድማ ከም ሜሪ ኢና። መብዛሕትና ምስዚ ኩነታት ከምእንመሳሰል ርግጸኛ እየ። እቲ ናቶም ሽግር ውሽጣዊ'ዩ‐ ኣብ ኣተሓሳስቦኦምን ኣእምሮኦምን። እቲ ደጋዊ ባህሪያቶም ድማ ናይቲ ውሽጣዊ ህይወቶም መግለጺ ኢዩ። ሰይጣን ድማ እንተዳኣ ኣእምሮና ተቖጻጺሩ፣ ተግባራትናውን ከምዝቆጻጸሮ ይፈልጥ'ዩ።

ኣብ ህይወትካ ክስበር ዘለዎ ጽኑዕ ዕርዲ ይህልወካ'ዩ። ከምዚ ኢለ ድማ ከተባብዓካ እደሊ። '' ኣምላኽ ኣብ ጎንኻ ኢዩ ''  ውግእ ኣሎካ፣ ናይቲ ውግእ ዓውዲ ድማ ኣእምሮኻ ኢዩ፣ እቲ ጽቡቕ ዜና ግን፣ ኣምላኽ ኩሉ ጊዜ ኣብ ጎንኻ ኮይኑ ይዋጋኣልካ።

ይቅጽል!

Battlefield of the mind  By Joyce Meyer (ትርጉም ዳንኤል ብርሃነ) 2008